الثلاثاء، 29 سبتمبر 2009

أحسن من العبارة الشهيرة .... هو كدة واذا كان عاجبك

قالى انه مش هيكون موجود يوم الوقفة وانه هيرجع البيت يوم الأحد اللى هو أول يوم العيد
هيبقى مع أهله ... هيسافرلهم ...
ماشى يا حبيبى ولا يهمك ... ممكن كمان تقضى معاهم يوم الحد كله وترجع باليل او تانى يوم الصبح
******
اصلى كدة كدة هبقى برضه مش فاضية وهأروح أعيد على العيلة والبنات هياخدوا العيديات
انا عارفة طبعا ان هو كدة كدة مش هييجى الحد الصبح ... اكيد هييجى بالليل او الإتنين الصبح
فقلت لنفسى ... سهليها عليه يا بت وخلى العيد يبقى جميل لينا كلنا
******
يوم الجمعة مشى بعد الصلاة ... عدى السبت يوم الوقفة... عدى الحد أول يوم العيد.... اتصلت بيه باليل عشان اعرف هييجى امتى
قالى : انا هأعمل بنصيحتك بقى وهقعد النهاردة
قلت : ماشى يا حبيبى .. هأروح أسهر بقى عند واحدة صاحبتى
.......... ورحى يا حبيبتى واخرجى براحتك ولما أجى راجع هأكلمك
الترجمة : براحتك بقى أصلى مش عارف هأرجع امتى
******
عدى عدى الإتنين تانى يوم العيد وعدى التلات تالت يوم العيد ... وظهر الأربع ... ما اتصلتش بيه طبعا لأنى كنت شايطة ومش طالبة خناق فى العيد
اتصل يوم الأربعاء الساعة الرابعة .... :)))))))) ... انا جاى ... انا رايحة مع البنات نتغذى برة
..... طيب استنونى لحد ما آوصل ونروح سوا
.....احنا لابسين ونازلين على السلم ...
..... طيب براحتك .... يغلق السماعة فى غضب وكأنى امرأة شريرة
*****
رجعت البيت على الساعة 8 م تقريبا مع البنات
أول حاجة لاحظتها بوكيه ورد كبير على البوفيه ....
الترجمة : انا عارف انى استهبلت وسبتك انتى والبنات فى العيد لوحدك ... قبل ما تتخانقى ... انا آسف
*****
الله يا حبيبى ... الورد دة لية أنا طبعا مش كدة؟ ..... يقبلنى فى شوق .... عجبك
انت اللى عاجبنى .... (طبعا هأتجنن ومتغاظة وهموت من الغيظ لأنه عمل اللى هو عايزه وسابنا لوحدنا
بس الجانب المشرق من الموضوع انه مقاليش العبارة الشهيرة .. هو كدة بقى واذا كان عاجبك ... او انا حر اعمل اللى انا عايزه
.... كفاية علية دموعى طول العيد ... مش طالبة بقى دموع تانى لخناقة بعد العيد
:))))))))))))))))))))))))))) .

هناك 10 تعليقات:

حـــــروف متــبعترة " عــمرو الشــايب يقول...

كل سنة و انتى طيبة

بس احلى حاجة عملها انه جاب البوكية بتاع الورد حلو اوى الشعور لما تدخي تلاقي جوزك جايبللك ورد اختصار لكل حاجة و معنىو احساس حلو ف كل حاجة

عاشقه الرومانسيه يقول...

طيب ما الراجل طلع جنتل مان اهو وصالحك
معلش ياقمر
والله فى رجاله كتير مش بيفرق معاهم زعل زوجاتهم
ربنا يبارك لك فيه وفى بناتك
(:
اول مره يضيع منى اول تعليق
انا زعلانه
هاعتبر نفسى الاول مكرر
(:

VÖltaa يقول...

اهلييين

كل سنة وانتى طيبة الاول ولو انها متأخرة

وحلوة حركة البوكيه دى

عوضت شوية عن اللى حصل

عالعموم يارب يفضل كده على طول وتسعدو بعض كمان وكمان

تحياتى

adel يقول...

تصدقي عاجبني قوي حركة الورد دي :):)
قلبك ابيض ياستي

هو عامل اللي في دماغه بس برضه يمكن ظروف يعني :):)

عيد سعيد و خلاص بقي :):)

مي يقول...

ماشاء الله عليكوا ربنا يديم السعادة عليكوا يارب ومعلش المهم ان الاساس الحب موجود بس مشاغل الحياة بتلهينا ساعات
بوسيلى البنتين
تحياتى يا حبيبتى

(Joudy) يقول...

كل سنة وانتى طيبة وربنا يسعدك ويبعد الكلمة دى وغيرها من الكلام اللى يعصب من قاموس حياتكوا نهائيا

دمتى بكل الخير والسعادة

Unknown يقول...

قرأت المذكرات
كلها قلبى معاكى
وعليكى كمان لكن
حأقولك اللى قالوه
كل اللى قبلى :معاكى
بنات وكمان واضح أنك
بتحبيه يبقى مفيش
ادامك الا الصبر
وطلب ده من
ربنا سبحانه
وتعالى انه يصبرك
على حياتك وأنك تقدرى
تستمرى على هذا لان مفيش
انسان بيتغير افتكرى له دايما
الحسنات والحاجات الحلوة وابعدى
عما عكس ذلك .
وكمان ودا المهم :
انتى فين ؟بقى لك مدة غايبة
عودى ياهاميس ههههههههههههه
ايوة كده اضحكى وانفضى عنك
الزعل وربنا يهدى الجميع.

عاشقه الرومانسيه يقول...

وحشتينى قلت اجى اسئل عنك
يارب تكونى بخير

نورا الهوارى يقول...

اكتبى اللى انتى عايزاه
ولو قلتى انى جوزك ناكك محدش له عندك حاجة

غير معرف يقول...

انا عايزه اعرف ليه انتي والبنات مش بتعيدوا مع عيلته هي دي المشكله مش انه مجاش
لو كنتي معه مكنش بات ولا يوم